Market Insight：電力股小注追落後

資金繼續轉吼落後板塊，昨日見到中資電力股有異動，華能國際（00902）、中國電力（02380）及華潤電力（00836）均升逾1%，大唐發電（00991）反彈4%，華電國際（01071）亦有2%升幅。

只是，未見有利好消息作配合，特別係內地經濟增長放緩，電力需求唔會有咩大突破，整體行業景氣一般，相信追落後上升空間亦有限，即市小注怡情尚可，押大注就不必了。

講開電力股，隻新能源股金風科技（02208）股價延續上周跌勢，昨日再跌5.5%，收報10.8元，較上月中旬高位累跌近兩成。

金風反彈力度有限

之所以被洗白白，主要係去年度業績派息未及預期，即使送紅股都未能補償股東的失望感，且早已預告首季純利按年至少跌五成。技術上，金風14日RSI經已落到20，股價回落至10元邊點都會抖一抖，惟料12元關阻力甚大，故別期望有太大反彈力度，等喺10元邊整固一段時間，先至好諗撈唔撈貨。

選股押錯注要付代價

復活節長假期將至，本周及下周港股都係得四個交易日，注意北水本周五同下周一又要暫停來港，所以有心理準備呢個幾禮拜成交都係靜啲。古勝都係重申尋日所講，短期都係炒股不炒市！

個股方面，二、三、四線股紛紛謀突破。好似昨日升幅榜中，國美金融科技（00628）爆升36%、御泰中彩（00555）升12%，人氣都幾旺。不過，睇見時富系兩隻股份異動，就唔係幾開胃。

自一四年至今，時富投資（01049）經已三次獲洽購手持的時富金融（00510）股份，先有天津系資金、繼而是內地泛海控股、最近一次洽購的買家係內地新恒基，三個都係內地財雄勢大的集團，但前兩者都係無功而回，而新恒基提出全購搞咗超過三季，最終改為認購時富金融新股成策略股東而已，即係話，呢段時間坐定定等時富金融染紅的散戶，都係損手居多。

炒染紅概念要等運到

老實講，呢三年本地金融股炒過N轉，但癡癡地等呢隻股染紅的話，真係要撼頭埋牆嗰隻！人做錯一次唔緊要，錯第二次就要認真改，錯埋第三次，第四次……都要照跟的話，就唔抵可憐！事實上，在下唔係第一次講呢系股份好難炒，魚缸咁多短炒選擇，真係唔明點解仲有人去掂。古勝一於繼續當時運高，睇佢唔到，有得炒就留番畀啲「專家」自娛！

領展北上有得有失

領展房地產基金（00823）又有新搞作，就係以40億元人仔收購廣州西城都薈廣場，項目淨收益率與之前收購上海及北京的投資物業項目相若。交易完成之後，料內地業務佔比將提升至9.1%。

之不過，唔少小股東都當領展係一家香港為本的公司，當管理層逐步增加內地投資比重，也許會同一啲小股東的期望有所出入。

再講，雖然是次收購作價合理，但增加投資內地比重會令公司收入的匯兌風險及市場風險增加，有得亦有失。

點講都好，領展現成主營仍是在港的屋邨商場及停車場投資物業回報穩定，且在經濟逆境之中表現能跑贏私營同業，所以有班長期捧場客。

高息股優勢減退

不過，這幾年領展致力透過優化物業組合提升效益的高峰已過，而目前香港樓價處頂峰，利率又趨升，整體高息股所享有的利好環境將會有所改變。以領展現時的估值睇，若然基金價格再衝阻力位58元受阻的話，會傾向趁高減持為妙。

古勝