絲絲講場：庫克預言美失科技龍頭
講到科技，一定講硅谷，喺硅谷幾乎係男人雄霸天下。不過Apple舵手庫克話，擔心美國好快喪失全球科技市場嘅領先地位，理由就係唔夠女人！
庫克上周接受母校奧本大學校報採訪，佢話無論係奧本大學，還是整個美國科技行業，喺科學（Science）、技術（Technology）、工程（Engineering）同數學（Mathematics）四大領域（簡稱STEM）嘅男多女少，令佢好擔憂。佢話呢種男女比例失衡將影響到美國科技產業，咁落去美國會連個科技領先地位都冇埋。
陰陽失衡 女工程師僅17%
男人威晒會有咩問題？庫克話，若STEM嘅女員工比例繼續低，美國就唔會又足夠多嘅創新，佢仲話呢個係個簡單事實。
有幾失衡？美國只得17.1%嘅工程師係女性；淨睇庫克母校，一五年新入學嘅工業工程本科生，男生多女生兩倍幾，都預視到將來會點。硅谷啲大佬唔知幾時先識驚呢？
余絲韻