絲絲講場：鱷王達利奧炒作管人同一招
「鱷王」達利奧（Ray Dalio）上個月由全球最大對沖基金Bridgewater（橋水）聯席行政總裁職位「再度引退」，但佢精神長存，事關佢將投資心法數據化輸入電腦演算，唔止管投資，仲應用埋喺公司管治上，即係連人都管埋。
投資犯錯後歸納守則
佢套心法嘅重點係「從錯誤中學習」，佢話自己每次犯錯都好慘痛，但後來發現啲錯其實蘊含「寶藏」，佢每次犯錯後就寫低一條規則，集埋集埋就歸納成一系列投資守則，並輸入電腦演算，再利用過去市場數據檢視自己嘅睇法。電腦演算唔止計得更多，仲可避免主觀情緒影響。
「要做到最好，查實應該係靠最佳嘅分散投資！」鱷王嘅心得係，假如有10或15個無關連但回報差唔多嘅落注，風險可降低75至85%，分散投資回報即升5倍！
達利奧用呢個方法慢慢建立Bridgewater嘅核心投資原則，之後仲將呢套「痛苦+反思=進步」嘅方法應用喺公司管治方面。
自90年代起，佢已將過往嘅過錯輯錄成叫做《原則》嘅員工手冊。近年公司員工已經升級到透過內部系統就可以查閱到「前人智慧」，並有計劃對外印刷出版。
「事情總係重複咁發生」，達利奧認為「我哋所經歷嘅市場周期亦係不斷咁重複」，「如果你能認識到呢點，洞察到呢啲重複行為，無論喺市場還是喺人身上，個Game就玩得更精！」
余絲韻