恒指近期日日走勢也差不多，先高後低，在指定二三百點範圍內浮浮沉沉。悲觀睇是大戶托住散貨，樂觀睇是炒股不炒市，投資者戰意如虹，只是暫避幾隻大藍籌。
好淡各有理據，買大買細，悉隨尊便，視乎心水而已。唯一建議是操作上最好選定一個立場，睇好就每次吼低位買，相反睇淡便堅持逢高做淡，千萬不要一時一樣。
高沽低揸食齊兩邊，表面上更勝一籌，問題是恒指不經不覺悶戰了兩個星期，應該是時候快要突破。假設是睇好，貪走位偏偏在高位做淡，卻不夠運真的遇上突破爆出單邊升市，士氣會大受打擊，而接着的部署亦會很亂，並不是有太多人斬完淡倉之後能夠果斷轉身追。
自己這一個浪堅持睇好，第二季度表面上有一大堆不明朗因素，可是個個都知的情況下，照樣瘋狂炒股不炒市，應該是相當利好的啟示，因為不似是一般外行人會夠膽博。當消息一個接一個明朗化，估計即使個別情況出現稍為不利的發展，市況也可望逐步改善。
樂天派在首季大豐收，就算單計近日戰況，一樣佔盡上風，買中上升股票的機會根本頗大，淡友只不過主守兩三個弱勢板塊而已。好友難得有本在手，氣氛不差又未見逆轉契機，自然是疊上去博過關，直到斷纜為止。發夢逆市博大跌，幾乎未收過錢，又一次證明樂天且戰且走炒住先，會好過杞人憂天望股災。
豐盛金融資產管理董事 黃國英（作者為註冊持牌人士）