Market Insight：中資電訊股惹憧憬

晨咁早傳來中國聯通（00762）停牌的消息，即時聯想到係咪同股改有關，而間接控股香港上市聯通的A股中國聯通（600050.SH）亦同時停牌，入夜後證實母公司正準備混合制改革。

關於聯通混改，有兩點需要注意，其一乃早前市場盛傳三大互聯網巨頭百度、阿里巴巴及騰訊（00700）（BAT）擬參與聯通的混改；其二，乃中國聯通集團會如何重組架構，包括理順A、H股公司關係，並將集團整體注入上市公司，又或將網絡子公司分拆出來並引入BAT作為股東。

無論如何，三大電訊商股改及與BAT涉及股權投資的合作一旦開出先例，料有助提升整個板塊的估值，故見昨日都有資金率先入場掃入中國電信（00728），股價一度高見3.94元，收報3.91元，升3.1%；中國移動（00941）升幅相對溫和，收報86.75元，升0.9%。

富智康低位唔怕撈貨

講到電訊股，唔爭在睇睇蘋果概念股富智康集團（02038），公司意外地發盈警，預計今年上半年業績盈轉虧，綜合虧損淨額將少於1.1億美元，主要係公司於去年五月所公布的合作協議下與新業務組別相關的成本所致，即係話同去年夥拍芬蘭HMD公司共同收購的諾基亞品牌業務有關。

新iPhone帶動業務

消息一出震散股價，昨日一度低見2.7元，收市報2.73元，跌12%，市值就咁蒸發咗30億銀。其實感震驚的唔單只係小股東，就連大行都跌晒眼鏡，好似二月才將富智康投資評級由「中性」上調至「跑贏大市」的瑞信，即刻發報告將該股的投資評級降番落「中性」。所以話，投資評級可以時時改，投資者只能作為參考，要識執生，謹記魚缸「有早知冇乞兒」！

純睇走勢，富智康股價震盪過後，相信在2.6至2.7元水平即二月上旬的大裂口區域會有初步支持，若然睇好今年稍後時間蘋果公司發表iPhone面世十周年的重點產品──iPhone 8行情，次季調整倒樂見低位收集的機會。

炒概念都係食咗先講

「雄安新區」的消息喺A股假後復市大爆發，數十隻相關概念A股漲停，周一急升的金隅股份（02009），昨日早段一度飆到上5.25元，其後現回吐壓力，收市僅升10.5%報4.81元，有聽古勝講唔好高追等回先諗，有貨要見好識收！

該地區房地產炒到甩轆，搞到當地政府推外地居民限購令以遏炒風。事實上，一個新區的建設，始終係十年以至數十年的事，至於話新區建設可以帶動資源需求，查實現時內地製造業升級改造，幾個重點行業如煤炭、水泥等市場供需失衡問題仍然嚴峻，豈可因一個新區的落實建設而可在短時間內解決供給側問題？

難怪大摩都忍唔住潑冷水，話雖然雄安新區建設可對金隅的水泥業務有正面推動作用，但市場過度興奮，反而須留意一七至一九年房地產業務將對金隅的盈利造成拖累，故將其評級由「增持」降至「減持」，H股目標價睇3.1元。所以話，跟炒並無不可，但記得唔好聽概念古仔聽到上晒腦，博老命不能自拔。

古勝