絲絲講場：大學生想入私人銀行暑假好機會

唔少年輕人有心入金融界但就呻無路數，但金融界就呻自從○八年金融海嘯後，啲年輕人一見銀行工就怕怕！點都好，嗱依家就有20個私銀Banker位等住讀緊大學的你。

由於市場對財富管理服務需求大增，金融管理局夥拍私人財富管理公會（PWMA），推出一個私人財富管理先導人才培訓計劃。不過唔係咩人都可以申請，你要係八大院校全日制學生。重點係，完成兩年嘅暑期培訓，畢業後有機會喺私銀開工。

呢個為期兩個暑假嘅培訓計劃，究竟有咩學？PWMA主席盧彩雲（Amy）話，學生將會於私人財富管理機構內學風險管理、合規及內部監控細節。學生每個月仲會有唔少過1萬蚊嘅津貼！以培訓計劃嚟講，唔算少。

Amy仲有貼士醒大家，話最緊要份人有熱誠，對金融市場有認識，仲要做多啲功課了解一下咩係財富管理，未來會有咩發展。如果學生對某一間銀行特別有興趣，記得要熟讀嗰間銀行背景。

個計劃名額唔多，只得20個，快手啦！

余絲韻