講開巴菲特，佢活到86歲覺得人生最美好嘅事係咩？佢竟然話係考唔入哈佛！
佢當年19歲，醒目仔一名，未面試就以為自己入硬哈佛大學。點知Interview咗10分鐘左右，人家已經出聲話唔收佢！佢當時第一反應係「點同阿爸交代？大鑊！」
巴菲特搵出路，見哥倫比亞大學本Catalog有兩個教授名佢認得，就係「價值投資之父」格雷姆（Benjamin Graham）同經濟學家David Dodd，事關巴菲特睇過佢兩位合著嘅書《證券分析》。佢即寫信畀人，話「Dear Professor Dodd，我以為閣下等已過身，原來閣下等仍在世兼且任教哥倫比亞大學，我極渴望能入讀。」結果Dodd咁都收佢！
格雷姆嘅教導，巴菲特畢生受用，尤其係「投資兩大守則」：第一、永遠唔好蝕錢；第二、永遠緊記第一條守則。喺格雷姆門下，巴菲特確定往後一生嘅投資信念，成為股神，依家身家約750億美元。
早幾個月股神同摯友微軟創辦人蓋茨喺哥倫比亞大學有個對談，股神仍然話哈佛唔收佢，係自己人生最好嘅事！如果可以從頭來過，股神與蓋茨又會選擇做咩？
股神話會做番一樣嘅選擇，佢話喺投資呢行，20歲、30歲時都好快樂，到依家86歲依然係，所以佢提醒年輕人要做自己喜歡嘅事。蓋茨亦話會揀番做電腦，因為自己熱愛科學。
余絲韻