絲絲講場:國畫最好賣 跑贏印象派

講開藝術,絲絲睇到的是錢。邊類藝術品最有市?就係國畫跑贏印象派。

全球市場連縮兩年

瑞銀出新鮮熱辣報告,全球藝術品市場連續兩年收縮,去年銷售跌11%得番566億美元,一三年與一四年好景時嘅增長無晒嚕。

拍賣銷售尤其甘,去年跌26%!戰後及當代藝術品(當代者,即是20世紀末至今嗰啲)拍賣銷售跌18%,印象派(即是19世紀中,莫奈畫嘅睡蓮嗰啲)就跌31%;最甘係現代藝術品(泛指1860至1970年代嗰啲), 勁跌43%!不過Old Masters類(即是19世紀藝術品),中國國畫銷售升5%,跑贏歐洲印象派畫。

連藝術品都講網購,網上銷售升咗4%,佔全球市場9%,不過多數係買賣5萬美元,即是40萬港元未到嘅「平」嘢。

余絲韻