絲絲講場：華爾街銅牛唔妥銅妹

美國華爾街隻銅牛，係繼自由神像後，紐約市第二大必到景點，中國遊客唔摸過唔安樂。但近日對面擺咗個銅妹像，創作銅牛嘅藝術家唔妥風頭被搶，踩銅妹只係件宣傳品，話自己隻銅牛先係藝術，仲想趕走銅妹。

話說，道富環球投資為慶祝國際婦女日，三月初擺咗個「無有怕妹」（Fearless Girl）銅像，宣傳「企業領袖性別多樣化」，仲放正對住隻華爾街銅牛。創作銅牛位藝術家Di Modica好不滿，覺得咁樣搞到佢隻牛變反派好似蝦緊個靚妹咁。

呢隻7,100磅銅牛，係八七美國股災後，Di Modica大叔自資製作，寓意「剛強」，原本放紐交所前面，自從搬去華爾街後，聽講又的確喚起「獸性」帶嚟牛市。

藝術家仲促請當局審慎考慮，四月二日臨時許可屆滿後，係咪畀銅妹繼續擺。咁惡，唔怪得大叔話隻銅牛係美國嘅象徵！

余絲韻