有人話香港兩年後會畀深圳爬頭，但有件事內地同新加坡一早贏咗香港，就係對偉大在職媽咪嘅體諒。按國際標準，婦女有權享受時間唔少過14周嘅產假，內地、新加坡、日本同唔少歐洲國家一早做到，而香港跑輸大市。
依照香港《僱傭條例》，在港工作女性只享有10個星期嘅產假。咁少，點夠休息啊？好在仲有國際大行肯將福利帶畀香港嘅準爸媽，渣打銀行（香港）有薪產假由12個星期增加到20個星期，侍產假由5日增加到兩個星期，而領養兒童嘅父母有薪領養假亦由5日增加到兩星期。
滙豐銀行產假有14個星期，而其餘唔少銀行都係得10星期，希望各大銀行同其他僱主學吓產假國際化，唔係真係唔夠競爭力囉！
余絲韻