Market Insight:汽車板塊趁調整部署

港股昨日彈過百幾點,但都係唔多夠力水,恒指收市僅升得43點,收報23,596點,主板成交縮至622億元。今個月係企業派發成績表的高峰期,睇怕可以少理指數,齋炒個股。

首日以藍籌股身份交易的吉利汽車(00175)股價回軟,昨最低見10.42元,收報10.64元,跌0.56%。聽聞去年末季有對沖基金大手沽空吉汽,結果因為吉汽爆冷入恒指,被挾到眼睜睜,挾倉活動同染藍炒作告一段落,照計隻股都要抖抖氣。

新晨動力現突破

至於汽車股係咪經已升完冇得炒,咁就未必,皆因上周傳出內地汽車組織再次向相關部門提出重啟汽車下鄉政策以拉動內需。

其實,建議重推汽車下鄉的背後,可能同行業庫存量上升有關。內地汽車業僱用不少勞工,喺行業庫存上升之下,及時出招消化庫存壓力實在有其必要,否則唔止汽車行業,就連整個就業市場都會增添變數。

多隻汽車股中,早前已發盈喜的比亞迪股份(01211)趁股價調整中線諗得過。另外,昨日見行第二棍的新晨動力(01148),收市大漲8.7%報1.62元,成交急增配合升勢,睇吓呢轉衝唔衝到上1.8至2元區域。

內房搶地別有用意?

古勝昨日講到家陣香港樓價堅離地,今日又再探討吓點解啲內地二線房企咁積極來港投地。

以近期一幅貴重地皮為例,中標價連建築費同利息,起好之後,保守估計呎價要幾萬元樓上!真係唔係普通香港用家可以負擔到。咁又係咪真係會有咁多內地豪客肯以咁貴價錢買呢類所謂「豪宅」呢?

其實如果後市真係咁樂觀,相信點都唔輪到二線內房企業中標。唔少一線內房更具財務實力,即使係本地發展商,亦都唔缺錢搶地,未輪到過江龍奪標,咁點解又會畀二線內房跑出?有指與走資有關,但二線內房財務狀況唔強得去邊,係咪多錢到要如此走資,係一個疑問。

項目利錢或非首要考慮

眾所周知,香港物業發展項目融資成本平,在取得項目融資後,或有可能將錢調回內地賺息差亦不出奇。至於話個發展項目有冇利錢,反正香港唔係內房主戰場,十年八載的發展項目,呢一刻都毋須多在意。不過,這都是猜測而已。

恒地具備重組概念

咁講法,以為內地發展商癲價投地係樓市大好信號,好可能表錯情。反而,現時動輒呎價兩、三萬元的新盤,發展商提供二按,買家變相九成或九成半上車。大量呢類盤放租,租金升唔起,甚而收租根本唔夠供,一旦加息步伐超乎預期,供唔掂,睇怕屆時銀主盤量將會大升。

買股值博率更高

所以話,呢一刻有錢投資的話,寧願買股票好過買樓,一來升到呢啲價,投資物業值博率下降;二來股票投資唔設罰息期、唔使交物業稅,鍾意幾時買賣都得,有咩事跳車都快啲。

最近市場開始提早消化三月美國聯儲局加息,到真係加息亦未必有太大衝擊,關鍵係年內餘下時間的加息步伐。目前本地地產股繼續坐享地價上升引發的重估潮。昨日古勝就話睇好新鴻基地產(00016)、長實地產(01113)以及恒基地產(00012)三巨頭,今日就特別講講隻恒地。

事關恒地現價市帳率才0.65倍,過往積極收購市區舊樓重建,重估潛力係三者之冠。再講,四叔一把年紀,捧恒基系重組概念亦都好正路。嚟緊業績期,不妨睇實該系表現。

古勝