絲絲講場：《富爸爸》作者：必爆股災

嬰兒潮長者撤出股市

係關嬰兒潮（Baby Boom）事。話說二次世界大戰之後，男人打完仗解甲返鄉，終於可以安安樂樂製造BB，於是一九四六年至一九六四年間大量BB出世，人口暴增，呢個就叫嬰兒潮。

計起上嚟，班嬰兒潮人士嘅年紀依家開始踏入七字頭。喺美國，多數人都會有個延後課稅帳戶儲退休錢，呢類帳戶特色係，提錢時先要交稅，但最盡只係去到七十歲半。清崎話，按法例，凡夠七十歲半者，就要於到達該年齡往後一年嘅四月前提走啲錢，換言之，大班嬰兒潮人士依家要提錢走！

影響有幾大？嗱，嬰兒潮人數大概7,600萬，而根據紐約梅隆銀行數據，呢班人嘅延後課稅退休帳戶持有大約10萬億美元！都仲未計另外有啲人要沽售股票作退休用，所以清崎話，市場作投資嘅資金開始乾，股市會玩完。

15年前預警 道指太High

查實，清崎早於○二年預警過，全球一六年會有股災。去年無事，只不過係佢冇預到有特朗普升市。但佢今時依然相信「人口宿命」躲不過，仲話道指最近升穿20,000點根本係過於「亢奮」，完全脫離基本因素，若計埋英國脫歐、意大利及德國各有隱憂後，經濟增長動力根本唔強。

所以清崎認為，投資股市係大錯特錯，尤其唔主張長線投資。佢話：「目前嘅結構性財政問題，大到冇任何嘢可以阻止，就好似我呢輩（退休人士）最大嘅擔心係，終有一日冇晒錢用，驅動金融市場嘅就係呢種恐慌情緒，而唔係邏輯！尤其係好多退休投資計劃標榜預計回報有8厘，但現實利率僅1厘、0或甚至負利率，啲回報根本完全唔得！」

睇到呢度，各位有冇覺得寒寒哋呢……

余絲韻