最近中資好興嚟港搶地，絲絲尋日參加內地房企老大哥華潤置地（01109）春茗飯局，見潤地早前都有入標競投黃竹坑站第一期，當然把握機會問吓對投資香港樓市睇法。
當問到有本地龍頭發展商暗喻中資係「癲價」搶地，潤地副總裁兼首席人力資源官孫永強話，佢哋都有就投資香港樓市進行研究，大家見解唔同，好難評論同行睇法，但市場多咗競爭係件好事。
佢又話，公司北京物業發展項目橡樹灣，當年有搵香港發展商傾合作，但睇法唔同冇傾成，結果其後呢個項目發展得相當成功。言下之意，到底係香港發展商缺乏遠見，抑或內地發展商太過進取呢？
余絲韻