絲絲講場：梁太寫回憶錄有料爆？
創興銀行（01111）舊年業績「省鏡」，難怪副主席、董事總經理兼行政總裁梁高美懿，出嚟見記者都特別容光煥發。梁太喺銀行界打滾多年，經歷唔少風雨，亦同好多大人物交過手，佢話有興趣退休之後，寫番本回憶錄，記低銀行界嘅見聞。
讚滙控前大班仆心仆命
梁太席間都有分享同滙豐控股（00005）前大班浦偉士嘅工作點滴，佢話對方盡心盡力為銀行同大眾服務，對業務情況亦倒背如流，深得下屬尊重，係難得人才。
絲絲就咁聽已經覺得意猶未盡，之但係本書就可能有排等，事關梁太早排去睇中醫，醫師先話佢身體健康，冇乜地方要調理，邊有咁早退休呀！
余絲韻