絲絲講場：金管Sell債撞正驚天暗殺
出差遇着筍Job兼可以喺旅遊區留多幾日就真係爽，但遇着咩突發意外，尤其是依家恐襲咁多，都咪話唔擔心。
金管局為Sell伊斯蘭債，派咗兩班同事出差，一組去利雅得、吉達、杜拜、阿布扎比同倫敦，另一組去馬來西亞同新加坡。睇牌面似乎第一組同事高危啲，咁就要考大家有冇睇國際新聞嘞！
答案就係北韓領袖金正恩嘅哥哥金正男喺機場遭暗殺嘅馬來西亞囉。有份去馬來西亞出差嘅助理總裁（外事）李永誠（Vincent）話，嗰日佢喺吉隆坡機場準備離境，點知遇到一件咁嘅國際大事，都算係出差路途上一段插曲。
心痛同事捱苦
Vincent比較心痛另一組同事，佢哋四日內要穿梭五個城市，連續四日喺飛機食晚餐，落機到酒店已三更半夜，第二朝7點趕開會，真係唔算咩筍Trip。
余絲韻