Market Insight：比亞迪獲大行力撐

至於早前曾傳出北京的士全部改換電動車，之後又有消息指方案被否決。其實諸如此類的消息，顯示內地喺推動電動車產業發展方面，行事小心審慎，為了確保質素及便於管理，未來行業發展亦必然是大企業行先。

講到電動車，又睇吓比亞迪（01211）。上周五公布去年度業績快報，料純利增長78%至50.4億元人民幣。受消息刺激，昨日逆市升2.6%，收報46.3元。可以話，過去兩個財政年度的業績表現，已證明比亞迪已發展為一家有盈利能力的新能源車企。

當然，比亞迪盈利質素係咪真係持續有大改進，尚待公布詳細業績數據才可下判語。但見到大行經已急不及待畀Like！摩通話視比亞迪為中國汽車業首選股份，主要係預計二○年前內地新能源車行業年均複合增長率可達20%，加上明年「碳交易」將成為重要議題，比亞迪將可受惠。

古勝則認為，比亞迪兼具新能源汽車動力電池產能，具有全產業鏈優勢，可為估值加分，只要行業景氣持續向好，呢隻龍頭股表現值得期待，每次回落至40元邊唔怕買，年內目標再試衝去年高位57.25元。

中資股仍具炒作空間

反觀香港新一份財政預算案其中一項措施，係唔再為電動車提供首次登記稅免徵，改設有97,500元的寬免上限。理由係近年汽車數量大增。問題係，稅款大增，並不利環保電動車銷售，消費者將貨就價，改出燃油車，汽車銷售比例中電動車佔比料下降，咁到頭來又係咪更加不利推動環保呢？

恒指料窄幅上落

講番個市，昨日為港股期指結算日，恒指表現反覆，24,000點關承接力不足，即市得而復失，埋單唔見40點，收報23,925點。老實講，呢個二月港股表現都算喜出望外。不過，展望三月，外圍不明朗因素頗多，有心理準備市況或較波動，除非北水大舉流入，否則向上空間未必太多；但除非外圍市況極差，否則在顧及北水來港因素下，空軍亦未敢太肆無忌憚，所以結論係恒指好大機會在23,200至24,400點水平上落。

本月國指升勢受制10,600點水平，暫退守10,300點水平，三月有機會回試10,000點關。不過，若守穩其上，亦毋須過於悲觀，特別係嚟緊就係兩會會期，分別於本周五及下周日召開，按理A股會有股維穩力量撐住，不妨留意吓中資板塊的消息，炒股唔炒市。

環保概念股有睇頭

內地空氣污染問題持續有改善空間，主要由兩方面入手，分別係限制排放同鼓勵用潔淨能源，所涉及的層面廣泛。由發電開始，到下游用戶的使用，包括工業及一般大眾都牽涉在內，已經實行的有淘汰高污染排放的企業及車輛、煤改氣、以補貼等方式推動新能源應用等。問題不是一時三刻可以改善，加上環境保護議題近幾年因霧霾嚴重，先加速喺社會上發酵，要走的路仍長。

光國業績值得關注

兩會即將召開，中國的經濟發展當然係重要議題，而環保亦係其中一項關注重點，除咗空氣污染之外，水土污染亦係需要解決，對於相關股務或技術的需求未來應有增無減。

其實從北控水務（00371）及光大國際（00257）去年中期業績表現，亦可窺一二。北控的水環境治理建造服務、水環境治理技術服務及銷售設備兩個分部收入均按年增長理想。至於光國，來自水務項目的收入按年增長四成，綠色環保項目更有2.8倍的增幅，集團今日公布去年業績，不妨留意吓會唔會為板塊帶嚟一啲好消息。

古勝