Bitcoin（比特幣）都有ETF（交易所買賣基金）？！無錯，美國有對Winklevoss孖生兄弟向當地證交會（SEC）申請緊隻比特幣ETF叫「Winkelvoss ETF」，最遲三月十一日就知批唔批，若過到就係史上首隻比特幣ETF。近排比特幣炒高到癲晒，唔多唔少亦多得佢。
加埋市場炒作美國特朗普政府將放寬對電子貨幣嘅監管，比特幣近日價格仍然處於歷史高位，升到上1,181.64美元及7,867.19元人民幣。
不過喺呢個關鍵時刻，有對賭平台顯示，僅有34%人睇好呢個ETF最終會成功獲批。外媒仲分析話，一個唔覺意隻比特幣ETF無得上市，比特幣價格分分鐘插三分之一，大概見800美元。
好難怪人唔睇好，話說連幫佢哋搞上市嘅著名ETF律師Kathleen Moriarty團隊，初頭都唔想接呢單Job，驚係一場龐氏騙局。呢位Moriarty喺ETF行內地位超然，有個朵叫「Spider-Woman」，事關佢當年一手搞成全球第一隻亦係最大嗰隻ETF上市，嗰隻ETF股份代號就叫SPY。今回蜘珠女之吻使唔使得？仲有個幾星期就知。
余絲韻