絲絲講場：滙豐高層推欖球「入屋」

個Gag係爛啲，但個波係真嘅，係個欖球。事關有份贊助七人欖球賽嘅滙豐銀行又再出錢出力，同香港欖球總會、香港教育大學合辦「滙豐欖球體驗」，教授小學老師欖球運動嘅知識同技巧，未來小學生都有機會喺體育堂學欖球，希望令七人欖球成功「入屋」，呢班學生隨時喺二○二四年代表香港參加奧運欖球賽！

滙豐亞太區零售銀行及財富管理業務主管麥浩宏（Kevin）話，放假都鍾意同囝囝一齊玩欖球。如果獅子行做生意都好似打欖球咁有衝勁，小股東們應該就唔使憂嘞！

余絲韻