絲絲講場：港鐵CFO轉數快識救命

力Sell減排計劃

絲絲聽講，有次許亮華去歐洲見投資者，差啲被人問到口啞啞。亞洲投資者多數關心上市公司盈利前景、派息能力之類，點知當日嗰位歐洲投資者竟然問：「你哋啲列車嘅用電，有幾多成來自化石能源？幾多成來自再生能源？」原來對方係環保基金，想知港鐵究竟有幾環保。

許亮華同啲同事惟有立即上網查，話港鐵同香港市民一樣，都係幫襯香港兩間電力公司，而發電能源就分別有煤、天然氣、風力，以及引入鄰近地區核電咁咁咁。見唔能夠完全解答能源比例，佢即時轉向投資者Sell港鐵嘅減排計劃，就係咁解除咗場「能源危機」！

在私，絲絲知許亮華隨身帶住支「救命針」。原來佢有次出席舊生會活動，睇住有位校友講咗句「好頭暈」就暈低咗。大家Call完救護車後，就唔知點算。

隨身帶備一支針

忽然有人行出嚟，先按對方人中（鼻對落位置），見冇效，跟手再攞支針篤十指指尖放血，話咁加速血液運行。結果對方轉為甦醒，然後送院。呢招背後有咩醫學根據，絲絲唔曉，淨係知許亮華自始就一針傍身走天涯。

余絲韻