孖妹Ｓ檔案：北水心雄 港股點揀？

大市挑戰高位無難度

潘：大成國際資產管理投資研究部基金經理 潘國輝（Herman）

彩兒：你個樣有啲緊張喎，唔通今次升浪真係玩完？

潘：唔係啊，我個樣一向都係咁認真。其實恒指上到24,000點，我唔覺得危危乎喎，因為都唔係特別高嘅位，首先一月升幅只係糾正十二月跌多咗，升浪真正起步係二萬三千幾點開始上去24,000點，其實升得唔多，睇番環球股市，好似美國以至日本等都創出52周新高，香港只不過係追落後，所以現水平做吓整固係合理，之後再創新高都唔大問題。

港股依家係資金市，睇到Turnover（成交額）連續多日超過800億元，其實動力幾夠，無論係北水定環球資金都好，都開始買緊港股，所以Fund Flow（資金流）係正面，亦睇唔到突然流走嘅誘因。過去4至5年，市場會覺得20,000至24,000點係一個好大嘅Trading Range（交易區間）、係唔會穿，但今年就有機會突破呢個區間，我覺得今年大市會係反覆上升，現時升勢亦睇唔到過急，投資者信心係回復緊。

大成國際潘國輝預料，今年市況會好過去年。（朱晉呈攝）

大成國際潘國輝睇好板塊

多個利好因素護航

Kitty：你咁講，我個心都定啲，今年會唔會係大牛市？

潘：我哋睇今年個市會好過舊年，主要有幾個因素，首先係資金流；第二係追落後；第三係估值低，就算港股升咗咁多，以估值計，無論係市帳率同市盈率都低於環球股市平均水平；第四係因為基本因素，中國經濟因素轉好緊，舊年仲擔心緊硬着陸、人民幣貶值、中國PMI（製造業採購經理指數）喺50樓下，擔心會唔會衰退？但今年情況唔同咗，即使係經過農曆新年嘅淡季都好，數據仍然保持喺50樓上，係一個好信號；PPI（生產物價指數）按年已有增長，反映中下游工業議價能力提高，盈利增長改善，連帶年底銀行信貸質素都會有改善，推動一個良性循環。

另外，亦睇到中國唔少企業盈利恢復增長，預計恒指、恒生中國企業指數同MSCI中國指數成分股，今年都可以做到按年10%增長。

港股短期走勢要睇資金流有冇少到、睇三月業績期，舊年基數低，今年盈利前景會睇得好少少。另外，睇番外圍因素，美股升咗咁多，帶挈到港股唔少，若美股有回吐，港股會借機獲利回吐，但若佢有少少回調都算係健康，暫時見唔到資金撤離迹象，依家都冇乜特別嘢好驚。我預計，今年恒指全年升幅有機會達雙位數字。

基金吼買高增長股

彩兒：近期北水Taste係點，我哋可唔可以捉到路？

潘：今次睇到北水同過去印象唔同，唔係關注細價股，因應佢哋係尋求對抗人仔貶值嘅出路，所以由港股通睇到，大價股同藍籌股會較吸引佢哋，就好似滙豐控股（00005）、建設銀行（00939）、騰訊控股（00700）等等高質股。

Kitty：大成基金喺內地管理緊超過1,200億元人民幣資產，截至一月底，你隻Fund一個月累計升緊8.4%，之後點Keep好成績先？

潘：我管理嘅大成海外中國概念基金，依家投資策略主要都係由下而上，揀股、揀Sector……因為睇好個市，現金水平會較低，跟住基本因素同成長空間去揀公司，例如係高增長股同行業處於上升周期、有結構性增長嘅股票。

科網相關炙手可熱

我嘅投資目標係新經濟股票，買多啲消費股同科網股，包括電子商貿、網上廣告、網上娛樂、受惠中產消費升級嘅板塊，例如網上旅遊、教育，同埋手機零部件板塊。

彩兒：點解咁睇好？部分相關股都累積升咗唔少喎。

潘：電商潮流係不可逆轉、實體零售會不斷被網上零售蠶食，電商增長比率會慢慢增加，有長線潛力；至於網上廣告，中國科網公司同facebook比較下，透過網上視頻、直播等嘅廣告收益有望增加，盈利佔比會逐步提升；中國網民人數多，好捨得花錢花時間去玩網上遊戲，呢個情況唔會咁快逆轉，所以睇好網上遊戲廣告；網上旅遊板塊喺中國已成熟，未來就要睇吓點樣提高變現能力，今年盈利能力或有更大進步空間。

手機零部件股實際上係受惠升級潮，即使智能手機增長放緩，但零部件升級不斷加快，各品牌力爭客戶轉機；教育板塊受惠於中國人對教育嘅重視，升學競爭激烈，未來幾年對課餘補習嘅需求好大。

多個板塊追落後 值博

陳：華夏基金（香港）業務拓展部總監 陳志豪（Vincent）

Kitty：死火，我啲姊妹好驚青，華夏基金喺內地管理緊約1萬億元人民幣資產，你實收盡內地投資者口風，不如你幫手安撫佢哋啦。

陳：港股升咗咁耐，我覺得上升嘅空間係有，但未必好大，年頭升得多嘅係科技股、汽車龍頭股、原材料股、建材股等，二月內銀股就開始追落後，近期就輪到地產股升，我諗依家個市再大升機會唔大，頂多去到24,300至24,500點水平，預計依家去到三月中都會係上落市，投資應該揀追落後板塊同低估值板塊，地產股正追落後，有機會升多一浸，中資銀行股、本地券商股、基建股現時都值得睇好。因應整體港股累升已多，有機會回調，可以留意具防守力嘅公用股，例如電力股。

華夏基金陳志豪表示，強勢、基本因素佳的股份可長揸。

華夏基金陳志豪睇好板塊

A股受惠兩會看俏

港股主要受制於24,000點，主因早兩個星期開始，資金開始流出盈富基金（02800）同埋H股ETF（交易所買賣基金），大市升緊，但強積金資金係獲利離場，相信整體港股係上落市格局，所以華夏主力會投資追落後股份，長線睇好嘅股份，例如消費相關股，好似服裝等，新能源、科技同醫療等都會趁低吸納。我諗強勢、基本因素好嘅股份可以長揸；若近期升得多嘅，好似汽車或內銀股，可轉倉去落後股。

彩兒：咦？咁睇嚟騰訊、友邦保險（01299）等呢類優質股暫時就可以印印腳長揸啦！

陳：依家拎A股同港股比，A股表現應該會好啲，主因之前港股升多咗，AH股差價由高位收窄，A股兼有兩會帶挈，相信短線走勢會較好，兩會概念股亦會出現炒作，兩會概念方面，好似環保、一帶一路、國企改革同混改概念等都會受關注。

此外，我留意到內地指數期貨投資限制放寬，令期貨市場交易活躍咗，最近監管部門冇咁大動作，氣氛趨向放鬆，雖然近期有再融資嘅政策出台，用嚟完善市場制度，係一啲實務嘅嘢，而唔係想遏抑市場。再者，A股比起美股同港股都落後，現時開始短線會做好少少，所以A股ETF值得考慮。

美股中線恐有調整

Kitty：外圍股市好似好好景，但股市邊有長勝將軍？

陳：美國股市三大指數齊創新高，中線會有頗大嘅調整壓力，主因美股由○八年至今都冇乜點大跌過，現時美國經濟好轉，有加息條件，正路應該係六月同十二月加息，但之前聯儲局主席耶倫同其他官員口風相對鷹派，講過唔排除三月加息，若最終唔加，個市場氣氛都會慢慢轉差，港股都會受制於美股走勢。不過短線睇，美股都仍會繼續創新高，但要留意風險。

Kitty、彩兒

若有料報畀彩兒同Kitty或有嘢問，可電郵money.biz@on.cc