Market Insight：美股過晒火恐反高潮

調整殺到前先食胡

上周滙豐控股（00005）業績令市場失望，是拖累港股偏軟主因。上周五恒指跌149點報23,965點，是踏入一七年以來首次低於10日線收市。

話晒個市由舊年聖誕前夕已經累積逾2,500點升幅，重磅股回落，加上三、四線股雞犬皆升，似是一次短期較似樣調整殺到埋身的先兆，不妨趁在大市仲喺兩萬四邊食一食胡。

近排古勝舊同學來電，話唔想繼續將錢放銀行曬太陽，準備入市投資增值。查實工作關係，周不時收到親朋戚友類似問題，往往喺股市高位時最為頻密。今次特別在於港股兩萬四點雖然唔算差，不過海嘯至今，除前年港股大時代一陣子瘋狂，指數於萬八至兩萬五浮沉多年。

正路嚟講，既然唔係通街魚翅撈飯的日子，對初哥嚟講應該無咩特別入市誘因，一問之下，原來又同樓市有關。儲錢買樓卻被樓價放甩，尾燈都見唔到，死心下搵其他辦法保本增值。

長線回報隨時叻過芬佬

近年香港愈來愈A股化，上市公司劣幣驅逐良幣，掛牌半日可以被勒令拉閘，咪話唔得人驚。萬一買中一隻「長停公主」或莊家爆煲股，對於唔識分散投資，經常抱住一注獨贏心態博一鋪發達的初哥，真係要相當小心應付。

股神一向推崇備至

通常在下會建議新手買盈富基金（02800）呢一類交易所買賣基金（ETF），一來風險相當分散，再者，對股市一知半解的人，畀個冧巴唔係唔得，贏就好哋哋，萬一唔係想像的良性發展，怪責起嚟隨時朋友都無得做。

咪睇小簡簡單單的ETFs，所謂小數怕長計，單係夠分散及管理費夠低，長遠落去真係慳到唔少。最緊要係非全職炒家無咁多時間逐隻股票研究，ETFs合晒速食文化要求。

股市之對ETFs最推崇備至的，非要數股神巴菲特莫屬。話說海嘯期間，佢同對沖基金經理Ted Seides訂立十年之約，對賭百萬美元，睇吓長遠主動基金表現好啲，抑或係ETF表現好啲。

周末，股神給股東公開信中，列出Seides揀的五隻基金，即使九年累積都有進帳，但同指數基金累積升85.4%比輸緊九條街（九年計增長是2.2至7.1%），對於巴菲特贏錢唔算乜嘢，贏牙餃先無價，潛台詞係叫芬佬返屋企早抖。

麵粉價貴支持地產股

上周大市持續牛皮，一啲率先起動的板塊及個股見回吐，而落後的本地地產股卻跑贏大市。之前出台的樓市辣招，作用似乎唔大，而上周發表的財政預算案，未提及會推出新措施壓抑樓市，加上當日新世界發展（00017）公布的業績理想，中期基本溢利按年升逾五成，均成為板塊抽升的原因。

同時，新一年度賣地計劃中，新增二十幅地皮，其中八幅位於啟德發展區。事實上，該區多幅地皮早前已由中資發展商以高價奪得，未來會唔會仲係中資壟斷？唔係冇機會！再睇吓剛創出史上最貴的鴨脷洲地皮，就係由內房龍光地產（03380）及合景泰富（01813）聯手投得。

內地財團有的是錢，加上唔想睇住手上人仔不斷貶值，向外尋出路嚟講，香港的確近水樓台。

此外，近期見多個新盤銷情不俗，可見對房屋的需求不減，樓價居高不下的格局未變。本地地產股在資金流入下紛紛起動，多隻股份陸續公布業績，亦有機會帶動整個板塊氣氛。

古勝