絲絲講場：十年牙骹戰 股神贏面大

邊個向股神挑機？時光倒流番十年前。話說○七年，巴菲特批評對沖基金管理收費蠶食客戶嘅投資回報，仲話對沖基金嘅表現十年內贏唔過指數基金，對沖基金Protégé Partners當時大佬Ted Seides即向佢下戰書。

巴菲特於是就同Protégé Partners打賭100萬美元，以十年計，睇吓係對沖基金表現好啲定係指數基金勁啲。無論邊位贏輸，啲錢都會捐出去，只不過贏嗰位可以揀受益嘅慈善組織。

開局之初，Protégé Partners勁有信心，自覺有85%機會勝出，相反巴菲特就認為自己贏面只得60%。

巴菲特「心水」累升66%

唔經唔覺，截至一五年底，巴菲特揀嘅指數基金已經累升咗66%，但Protégé Partners揀嘅一籃子對沖基金只係升咗22%，差成條街。

賭局今年年底就埋單，雖然未知雙方舊年表現點，但睇番舊年標指累升咗12%，而對沖基金只係升得5.5%，睇嚟除非今年股災，否則股神贏硬。

股神果然係長期投資嘅擁躉，連一場打賭都賭夠十年！絲絲服。

余絲韻