孖妹S檔案：精選保值投資冧情人

股份轉名夠晒體面

劉：盛源證券高端客戶部聯席主管 劉偉洪（Ray）

Kitty：我有男股友仲未諗到送乜畀女友，再唔拍板，佢恐怕要過「愁人節」。

劉：好簡單啫，佢戶口有20手騰訊控股（00700），提10手出嚟送畀女友咪得囉，都值超過廿萬，最好提實貨，有嘢揸手實在啲嘛！我試過有同事去飲，覺得做人情冇乜特別，送股票代替人情，有心意之餘，仲有增值嘅作用添！

大戶有幫忙 散戶靠自己

彩兒：點提貨啊，會唔會超煩？佢可能每分鐘幾百萬上落喎！

劉：如果本身存咗貨喺證券行，想轉名過戶嘅話，一般做開大戶嘅行就會好周到咁幫你做晒全部手續嘅，但係一般主力做散戶嘅行呢，就要客戶自己嚟喇……首先就要喺證券戶口提股票出嚟先，普遍會收提貨手續費，每手5元，有最低收費，多數係30元左右啦，咁拎出嚟嘅就係實物股票，然後需要去過戶處做過戶，過戶費係每張2元，仲有要去稅局交番印花稅，每1,000元貨就交1元。

劉：以Kitty朋友為例，將10手（1,000股）騰訊轉名，當股價係205元，證券行會收50元，稅局會收205元印花稅，過戶處會收2元。如果佢食開大茶飯，就應該轉去啲湊大戶嘅行，咁送股票畀女友就方便好多喇。

Kitty：有冇啲快趣嘅方法呀？

劉：梗係有啦，可以足不出戶就搞掂添，你朋友可以聯絡存貨嘅證券行，同女朋友證券戶口做個交叉盤，如果同行就叫X盤，唔同行叫Y盤，男方沽貨，女方接貨，但成交價唔可以低過當日最低價，當中牽涉買入及賣出嘅佣金與印花稅，不過，佣金都已經夠食餐飯啦，所以我唔係咁建議囉。

揀股前睇愛侶性格

熊：財經評論員 熊麗萍（Conita）

羅：君陽證券助理研究經理 羅湋楠（Kathy）

彩兒：你哋平時好忙，但情人節點都要慶祝嘅！

熊：我哋一般會去食餐飯，間唔中都會收花嘅。

羅：我哋會低調慶祝，一齊煮吓飯仔都好Sweet。

汽車代理股看升15%

Kitty：情人節想送股份，點揀好呢？

熊：要睇番情人係邊類人喇，佢投資取態係點，係穩陣定進取，我就揀咗短、中、長線心水，畀未買禮物嘅股友參考吓。留意到近期汽車股走勢強勁，但實在係太勁喇，唔知上衝空間仲有幾多，所以我會推介汽車代理股中升控股（00881），佢主要做汽車經銷同售後服務，係冷門啲，但係顧及佢一五年業績急倒退，係因為中央政府早兩年打貪導致，相信一六年年度業績會有以倍數計增長，而且汽車銷售強勁，會帶挈汽車售後服務、保險同融資需求俱增，可以博佢短線上升15%。

熊：中線投資我建議揀隻第一拖拉機股份（00038），喺中央支持「三農」同埋推行農業供給側政策下，公司產品組品近幾年轉趨高檔，毛利高咗，基本面持續改善，佢上半年盈利增長係單位數字，但第三季見到增長擴大，全年業績或者有一倍增長，5元樓下值得入。

彩兒：如果想有長線關係，咁要揀邊隻股好呢？

熊：我就鍾意滙豐控股（00005），美國對金融機構監管放寬，罰錢嘅陰影已經反映咗喺股價度，加上相關機構對合規部投資俱增，預計未來罰款會減少，仲有美國加息推動息差抗闊，雖然受英國脫歐影響，令佢歐洲業務有不明朗因素，但受惠美國經濟好轉，料可對抗有關嘅盈利下滑，股息率約6厘，可長揸。

內銀及資源望發力

羅：美國特朗普剛上場，當地已進入加息周期，內地貨幣政策趨緊，通脹升溫，令內險股彈升，我依家反而會留意較低殘嘅內銀股，五大國有行嘅市帳率都低於1倍，又有國企改革概念，特別係龍頭股建設銀行（00939），業績靚仔，可以睇長線。

Kitty：如果想揀近期最Hit嘅股份又點好？

羅：可考慮基建同資源股，三月就係兩會，可以炒相關概念股，基建股出現異動，我會推介中國交通建設（01800），近期有突破，若可破舊年高位就有力再上，料兩會前可上望11至11.5元，會前可食胡；資源股方面可留意水泥股，環球PPI向好，受惠基建項目出台，有利基建同資源股，我較鍾意水泥股龍頭安徽海螺水泥股份（00914）同華潤水泥控股（01313）。

鑽石價穩豐儉由人

孫：周大福珠寶集團執行董事 孫志強

彩兒：股票咁實際，我寧願浪漫啲，收吓男友嘅鑽飾，戴喺身喺姊妹面前威吓！

孫：臨近情人節，好多情侶都嚟首飾店買禮物。今年嚟計，鑽飾同金飾都好受歡迎！

彩兒：金飾？唔係啩，咁老土！

孫：說話唔係咁講呀，又唔係買龍鳳鈪。金飾依家都前衞，例如同迪士尼合作系列，好多後生仔買，得意得嚟又實惠，當中以吊墜最受歡迎，最平幾百蚊有交易。鑽飾方面，情人節嘅話，心形石就最受歡迎，又或者圓形石，若「筆直」唔夠，可選擇以碎石砌成圓形石咁，一樣夠閃，一萬蚊以下都有交易。

Kitty：咁實惠，彩兒你可以買畀自己喎。今年情人節首飾店生意點樣呢？啲客出手豪唔豪呢？

孫：今年都幾好生意，每年情人節都可以比平日賣多五成。客人方面就視乎年紀，後生少少可能買幾百至幾千蚊，有經濟能力嘅客人就負擔到六位數字嘅飾物。另外，客人通常鍾意買有意義嘅鑽飾，情侶係六月二十日相識，咪會買6卡20份嘅鑽戒。

顏色切工影響價錢

Kitty：但會唔會驚貶值呀？

孫：呢層又唔使擔心，雖近年環球經濟一般，但鑽石價格近五年冇乜大變化，大家驚係因透明度低，唔似黃金有國際金價參考。金價方面就可能比起鑽石波動少少，真係視乎經濟環境同金價走勢。另外，依家高卡數嘅鑽石開採愈嚟愈少，以香港為例，三卡以上買少見少。

Kitty：國際金價真係反反覆覆，一一年最高上過每安士1,921美元，其後慢慢滑落，到上年又升番8%，依家喺1,225美元水平。除咗金價，買賣金飾時都要留意手工費，但唔知揀鑽石又難唔難呢？

孫：都係一門學問，除咗要睇有幾大粒、幾多卡之外，仲要留意顏色同切工，價錢可相差好遠，到時要問清楚售貨員呀。

Kitty、彩兒

若有料報畀彩兒同Kitty或有嘢問，可電郵money.biz@on.cc