中證監主席劉士余在全國證券期貨監管工作會議上話，資本市場唔允許大鱷呼風喚雨，對散戶「扒皮吸血」，要有計劃將一批資本大鱷逮回來，又指要花兩至三年時間解決新股堰塞湖問題。
港股上周表現唔錯，睇圖滙豐控股（00005）股價都有機會破頂，港交所（00388）如無意外本周將重上200元大關，只係隻騰訊控股（00700）走勢比較差，兩大支陰燭落番100日線。
二線藍籌方面，上周五有異動，蒙牛乳業（02319）、招商局港口（00144）及中國神華（01088）接力向上。到底去年底至今恒指反彈兩千點，係咪新升浪開始，抑或係升浪已近尾聲，刻下只有見步行步！
今個星期又睇吓隻資源股洛陽鉬業（03993）。洛鉬於去年完成收購英美資源鈮和磷酸鹽業務，而今年焦點則在於收購剛果TFM銅鈷礦權益的進度。早前公司申報公開發行A股的申請已獲中證監批准，雖然尚待好消息，但股價於去年底反覆向上，上周高位見2.58元，成交明顯增加。不過，3元關是大時代期間的高位，相信會有一定壓力，若見阻可先行獲利，待回試2.35元承接再作考慮。
順帶一提，上周重機股表現唔錯，博跟炒可以留意上海電氣（02727），上周五收報3.7元，成交有所增加。走勢上，股價在3至4元上落經已超過一年，呢轉睇吓破唔破到4元關，主要支持在3.5元水平。
司慕渢