本欄於上周五同大家講過，有「侵侵」一日港股開年都雞犬不寧，但我澄清並不睇淡後市，主要是憧憬內地A股於長假後復市，投資人要為巨資尋找可配置地方，「港股有market會是極受大媽歡迎的目的地」，我係咪講過先？
本周初，內地媒體引述全國社保基金理事會理事長樓繼偉指，「最近若干省份已委託社保基金理事會，對階段性的結餘養老保險金進行運作」，節省點來說即是「養老金入市」，即時谷起了港股尤其是內險股普遍大升特升，其中隻中國人壽（02628）升逾7%可謂誇啦啦，就連平時無人觸摸似廢堆的中國財險（02328）都升到2%，你話係咪醒？簡直無得頂！
這個時候，有些好清醒的人就話喇：「養老金入市你都信？真係old news is so exciting呀！」我尊重他們。長期抱持這種警覺性是一種美德，應該話唔想死都要靠這種本能。不過，我們又可唔可以信住先、坐順風車博大霧？
內地的投資人要於節後做配置，只投A股又會有輸匯率的可能；近日市場的氣氛好轉，美匯指數失守100，人民幣匯價回穩，人行仲「詐帝加息」添；如今深港通已經開通，滬港通又已經全面擴容；最最最重要的是：內地同香港是一國，南下的投資根本唔會畀阿爺challenge你走資！如是者，你認為大媽仲要考慮咩？
有人就話喇，養老金的入市比例係12%即係2,500億元人仔咋，比較起A股的市值同每日成交量，夠攝牙罅咩？
年輕人，你太唔了解國情喇！你認為假如官方落實了養老金大規模入市，內地的十幾億大媽會唔會同你狂風掃落葉咁幫手掃呢？我不是叫大家長坐呀，不過「buy on rumors, sell on facts」等政策落實先出貨都未遲啦，唔係升一日就縮呀嘛你？！
富昌金融研究部總監 譚朗蔚（作者為註冊持牌人士）