絲絲講場：卓百德父子通勝年卡測市
眨眼又到年十二，仍然覺得投資冇乜方向？絲絲剛收到星級分析員卓百德同佢位公子卓太馬（Peter及Tama Churchouse）嘅賀年卡，入面附埋雞年通勝。佢哋話，雞嘅屬性係較易悲觀，投資較傾向集中睇最壞情況，需要辛勤工作去累積財富。而今年財位就喺東方，股市年初升，下半年會急跌！
雖然雞屬性較其他生肖容易同人發生衝突，但就有頗強嘅戀愛運，亦都容易影響廣大社交同人際關係，所以環球政治毋須睇得太差，外交問題會轉趨穩定，並且會有喜劇性發展（絲絲希望唔係得啖笑咁解）。財位方面，中國嘅東面如台灣、日本、美國西岸相信經濟會慢慢回復，但西南面如巴基斯坦、印度洋一帶就會有較多天災。
全球經濟增長唔算強勁，所以投資者宜小心謹慎，多備Cash以待轉勢之機。
旺金融零售 忌炒樓
講到五行，屬水嘅投資較有利，具有流動特性嘅行業如金融、貿易、零售、船運就最好，其次係屬金的鋼鐵與貴金屬類行業。屬木行業（括紡織、時裝、造紙等）與屬火行業（電腦、互聯網、電訊、能源等）就分別排第三、四位。不過，屬土就最差，建築及建材就係呢類。所以佢哋話，雞年唔適宜投資住宅物業，預計回報率低兼且樓價有下跌風險，不過佢哋講明自住就另計。
余絲韻