絲絲講場：證監租約夠期使唔使搬竇？

去年證監會喺立法會財經事務委員會交代，有關租約訂明，雙方有權喺二○一七年同二○二○年終止租約，若證監會有意續租，就會就租金進行檢討。至於今年續租時，租金點樣調整，就唔知喇！

絲絲記得，證監會「老頂」去年話過會預留成30億元預備來買辦公室，都已經一年，唔通冇晒下文？講真，買辦公室唔係買棵菜，而且樓價咁高，如要買中區核心寫字樓，仲要有咁大地方，容納龐大嘅證監會團隊，真係談何容易？

交易大堂十月亦約滿

之不過，若今次續租後，二○二○年租約就到期，如果到時唔再續，之前都要做定準備工作，事關證監會處理咁多案件，掌握着大量機密資料，梗係小心啲好！

講開又講，香港交易所（00388）交易大堂今年十月亦約滿，咁究竟係咪會一如以往，繼續續租三年，定係會有新搞作，大家真係要到時至知！

交易大堂現時總面積達4.5萬平方呎，雖然近年交易大堂使用率唔高，出市員又愈來愈少，但交易大堂始終係本港金融市場Icon，而且可招待領導人參觀、同舉行上市儀式等，點都有存在價值！

余絲韻