我上周五的專欄同大家分析過，離岸人民幣企穩，但A股的走勢續弱，是「IPO太多」的緣故。語音剛落，中證監主席劉士余已經於上周六約談了大部分券商，就事件共商對策，但到執筆之時為止，我睇唔到有咩結論。
無可否認，市場對暫緩IPO的呼聲是挺高的，尤其是經歷了周一大盤跌到「媽媽不認得我」之後離奇deep V，不過，深創板還是要深潛逾3%後。市場開始憧憬：阿爺要出手喇，IPO的節奏是時候要拖慢一點了。
對唔住，我想兜頭淋大家一盆冷水：唔會！係唔會呀，發你個春秋大夢啦！「為甚麼呢？」這個問題應該是我問你呀！為甚麼你認為個市跌中證監就要變招？這樣想你真係好唔清楚國情喇！
我們做打工仔的最重要就是要meet到老細的KPI（關鍵績效指標呀！），其實劉士余都係打工，佢都有KPI的，咪就係八個字：「大盤平穩，融資增加！」至於咩叫做「大盤平穩」囉喎，有兩個標準：第一是季度震幅不多於10%；第二是單日震幅不多於2%。而「大盤」的定義只係包滬綜指咋，創業板同深成指唔該行開啦！
因此，我有理由推斷，即使創業板跌到七彩都好，中證監係唔會因此而調整他們於新股市場的策略，個策略就係：大幅度增加直接IPO的規模，同時又限制定向增發的數量囉，因為定增的錢係落唔到實體經濟家嘛！
我要講的已講完，咁對粉絲們有咩影響呢？簡單講：凡滬綜指單日跌超過2%，我便入市去博阿爺手影！唔係入A股呀，都係講緊港股！基於人民幣企穩，我依然相信恒指短暫受制22,927點的阻力後即使回調，都不會大幅跌破22,587點，後市應該係震盪平穩迎新春喇！
富昌金融研究部總監 譚朗蔚（作者為註冊持牌人士）