絲絲廣場：借場拍戲？港交所堅Say No！

數據中心需嚴密保安

點解數據中心咁得電影人歡心？原來好多大機構嘅數據中心都唔會張揚，甚至連門口都盡量唔掛公司名。之但係港交所數據中心二○一三年開幕時，請晒傳媒入去參觀，啲相出晒街。電影公司一見到，嘩，入面又似美國太空總署控制室，又有啲總統遇上國家災難時要監控全國咁Feel，咁有電影感，仲唔一個二個要求借景拍攝。

不過，無論係借邊度，港交所一律Say No。發言人話，數據中心係交易平台嘅心臟，需要嚴密保安，不宜高調。

之但係，唔借景啫，又未至於完全唔招呼嘅。近年唔少電影資料搜集時，查實都向港交所攞料，唔係邊得啲情節有咁逼真。

論逼真，要講當年套電視劇《大時代》，入面個交易大堂實情都係搭出來，連港交所中人都讚逼真。嗱股民唔使驚，絲絲係咁意講吓個景咋，明日個市冇事嘅冇事嘅。

余絲韻