內地股市昨日偏軟，但港股就反覆向上，多得騰訊控股（00700）、友邦保險（01299）及建設銀行（00939）發力，主板成交亦回升至622億元。老實講，指數每日一、兩百點波幅，五、六百億元成交，都唔係值得高興的事，因為波幅同交投都唔夠養活缸中人。
每逢年尾年頭，投行都為一年的金融市場走向作出預測，大部分估內地經濟增速將會略降，但仍會在6%以上，即係話衰極都會有個譜。其實，要維持呢個增長速度，一點也不容易。中央政治局常務委員會昨日召開會議，要求着力防範和化解各種風險，促進經濟平穩健康發展。
由此看來，至少在上半年，內地貨幣政策維持審慎，對經濟增長放慢的容忍度亦會提高，魚缸交投暫難有大起色，選股策略只有聚焦在維穩經濟政策方向，主力短打，管控好持倉風險。
板塊方面，昨日見到汽車及相關零部件股氣氛改善，其中從事汽車相關設計、製造轉向及動力傳動系統以及零部件業務的耐世特（01316），股價大升8.67%，收報9.53元，成交8,548萬元。
睇番股價走勢，去年八月公司公布中績勝預期，股價從8元樓下裂口上揚，九月見高位11.8元開始見頂回落，上周一度失守250日線，周五曾低見8.56元，昨日一支大陽燭重上10日及20日線，似乎是有資金嘗試抄底。
要留意的是，耐世特逾半收入來自北美業務，去年末季美元強勢應利好，但在美國候任總統特朗普上任後，經營環境會否發生變化則有待觀察。
提到汽車股，補充一句，經過多年高增長後，內地汽車市場已透支需求，今年產能過剩可能會較為凸顯。故沾手策略只宜短炒，不合中長線。若尚有一定持倉，宜把握每次反彈機會減持套現，候低再留意博反彈機會。
司慕渢