話咁快就係農曆新年，又係被追問拍拖結婚乜乜乜嘅時候，唔想得罪姨媽姑姐，點應付？不如講吓經濟，事關婚姻根本就係市場經濟行為，人通過比較成本與收益，來揀可以令自己獲得最大得益嘅對象，先會結婚。嗱幾咁得體。
結婚成本分兩類：第一係交易費用（Transaction Cost），包括要花時間了解對方、追人要使費、仲有辦婚禮等，簡單講就係由追求到拉埋天窗嘅成本；第二係機會成本（Opportunity Cost），即係你為棵樹放棄個樹林，或為揀內涵而放棄個樣，被放棄嗰啲就係機會成本。
雙方組成家庭可享「相對優勢（Comparative Advantage）」，勞動分工上（例如邊個返工邊個湊仔）、財政上、情感交流上，都可互補，即產生協同效應。（所以，你大可以話，之所以未打算結婚，係因為尚未見到有「相對優勢」）
經濟角度睇，「一見鍾情」未必正，因為「訊息不完全」兼未畀足「交易費用」，即係凡因「誤會」而結識，就愈易因「了解」而分手
好簡單，因為離婚成本比較低。所謂成本，係講「機會成本」，早離婚對於年輕男女而言，機會成本低，因為相對較易搵過另一個。
事關婚姻持續，成本會愈來愈高，但有咗細路，離婚可能性就會大大降低，事關細路係「耐用消費品」。以經濟學角度睇，要維持婚姻，就要生兒育女。不過細路並非愈多愈好，發達地區乜都貴，生細路嘅機會成本愈高。
以上查實係已故著名美國經濟學家貝克爾（Gary Becker，1930-2014）講嘅，佢係首創婚姻經濟學嘅大師。係時候搵佢本《A Treatise on The Family》（家庭論）溫定書，睇得嚟，就係拜年時。
余絲韻