絲絲講場：信用卡搶客力吸貓奴狗奴

唔少人係寵物奴，不但平日任勞任怨侍奉「主子」，難得放假仍想繼續黐實「主子」，同「主子」一齊去旅行。中國工商銀行（亞洲）睇準呢點，今期新卡迎新優惠特別針對「主子」而設，提供免費寵物旅遊諮詢服務。

協助「主子」出境旅遊

服務包括專業評估吓「主子」性格，教卡主點做個好「奴隸」，會講解同「主子」外遊出發前須辦理嘅出入境手續、所需嘅外遊前訓練同準備等，仲會介紹埋適合「主子」嘅酒店、航空公司同景點咁，等「主子」可以享受一個美好旅程。

知道一班貓奴狗奴習慣隨傳隨到，如果新客戶同時申請埋另一張白金卡，仲可以得到寵物追蹤服務計劃，包括送贈寵物追蹤器一個兼免首兩個月月費，畀啲忠心嘅奴隸隨時隨地「Follow」住「主子」。邊張卡？自己Check，以示你對「主子」嘅忠心。

余絲韻