Market Insight：燃氣股估值仍吸引

香港近日空氣污染指數超標，中港兩地愈來愈「親密」，唔單止股市互通，就連霧霾都要齊齊分享。中央早年就話要向污染宣戰，結果毫無起色，新能源政策朝令夕改，亦令市場無所適從，相信經過今年教訓，將令中央加大治理力度，而作為清潔能源之一的天然氣分銷商有望受惠政策利好。

昨日見燃氣股見明顯有追捧，華潤燃氣（01193）升6.2%收報23.9元，中國燃氣（00384）及新奧能源（02688）分別彈5.2%及4.1%；北京控股（00392）亦有1.3%升幅。

瑞信最新報告指，在工業需求增加及冬季取暖帶動下，大部分的燃氣公司都指去年第四季銷量見增長，相信可達全年銷量目標。

潤燃市場定位佳

該行料燃氣行業將繼續波動，不過股價去年已跑輸大市，加上行業需求改善，應可吸引投資者，其中首選潤燃，看好其於商業燃氣市場定位佳；其次為新奧及中燃。另有指國家能源局發布的「關於加快推進天然氣利用的意見」已結束意見徵求，有望短期內出台，若消息落實，對板塊或有刺激作用，加上油價反彈，相關股份現價估值處於吸引水平，既然短線有鑊氣，不妨順勢跟炒一轉。

散戶炒賣殼 講技巧

大市偏靜，但市場消息多多，最搶眼莫過於中信股份（00267）牽頭財團以最多20.8億美元收購麥當勞中港業務，股價先跌後回穩，升1.2%報11.46元。

此外，時富投資（01049）擬售時富金融（00510），查實唔係第一次。前年一度洽售予深圳上市公司泛海控股，誰知最終竟因為獨立股東否決賣盤而告吹。

到去年九月，時富投資又就擬售時富金融與親中商人高敬德旗下新恒基集團達成框架協議落實交易協議，本來預計在上月底達成買賣協議之條款，但奇怪買家收購及全購價每股0.51元，時富金融股價卻自上初起由0.5元水平跌至下旬曾低見0.325元，真係成事點會有咁大隻蛤乸隨街跳，心想唔通又煲冇米粥？點知死線日公布雙方訂立第二次修訂協議，限期延長至本月底。

詭異的是，時富金融其中一名主要股東在去年十月下旬多次入市減持，有咩啟示，等大家自己慢慢估。其實，有番咁上下炒齡的散戶，都知時富呢系向來都咁難玩，做旁觀者實際啲，睇吓今次呢位買家又會唔會空手而回。

中糧系主打重組題材

講番啲國策股，每年一月都係中央「一號文件」的發布時間，此前農業部印發全國奶業發展規劃，旨在打造國產乳品品牌。呢個口號，自毒奶事件後，大大話話都講咗好幾年，至今都依然在講，確實令人感到無奈。講到食品股，中糧控股（00606）上周五換主席兼發盈喜，昨日股價高見3.6元，之後升幅收窄，但收市仍有一成升幅，報3.4元。

中糧預計去年虧轉盈賺14億元，主要是受惠於產品銷量增加、內地玉米價格顯著下降，以及公司有效利用套期保值工具防範風險及應對行業需求增速放緩格局。蝕咗兩年，終於有錢賺，小股東自然高興。只是公司盈利表現存不穩定性，論基本因素唔易觸摸，反而同系重組消息年內有望陸續有來，有個盈喜打底點都好啲，回吐守3.2元樓上仲有得諗！

古勝