絲絲講場：花旗盧韋柏聖誕遊機河
30個鐘可以飛幾遠？由香港飛去美國都係15個鐘，去北海道都唔使5個鐘。不過花旗香港及澳門區行長盧韋柏（Weber）就用30個鐘由香港飛日本，咩都冇玩過就飛返香港機場，白忙一場！
事緣Weber一家人Book咗聖誕去北海道，周四晚機飛到去北海道降落唔到，徘徊幾個鐘後迫降東京機場，仲要坐定定喺機艙排隊等起飛，最終周六朝早先返到香港，辛苦過去美國開會。
可培養囡囡耐性
Weber話天氣唔好都無辦法，佢5歲嘅囡囡第一日都好失望，但第二日已經明白危險覺得應該要返香港，而且飛機無晒餐，餓起上嚟凍麵包都食得好滋味。所以雖然聖誕旅行泡湯，Weber話今次經歷培養出囡囡嘅耐性。
余絲韻