職場同炒股一樣，見任何異動要即時反應，調整策略，尤其臨近年尾最怕埋門一腳撻Q「被辭職」！留意以下3個「異動」，顯示你可能好快被炒。
眼看未為真？絲絲教埋你分辨是否自己諗多咗，送埋對策。
上司突然特別對你事事都白紙黑字寫清楚，轉用電郵溝通，更cc畀所有人，包括HR（人事部）。
•對策1︰確保電郵、文件內用字與內容都要專業，絕對不能畀HR抓住任何痛腳。
•對策2︰Update定自己份CV。
•有冇諗多咗？重點係「突然」同埋「只針對你」，否則好大機會係你自己多心。
突然將你負責嘅Project重新分配畀其他人，而且零解釋，甚至直接同你講「你未夠班」。
•對策︰要有禮貌地、正面地、有建設性地直接去問清楚被踢出局嘅原因，記住唔係去質問！
•有冇諗多咗？上司亦可能係想你處理更重要嘅嘢，又或者良心發現你手頭太多嘢做。要從不同角度仔細諗清楚先好下定論。
同事們一見你埋去就收口，顯得有啲緊張、有啲尷尬？佢哋似乎「收到風」公司要炒人，而嗰個人可能就係你。
•對策︰謠言仲可以反駁，呢種無以名狀嘅狀態最難搞，你惟有盡量理性去觀察、衡量同埋應對，總之兩個字：理性。
•有冇諗多咗？同事「有古怪」唔一定關「炒人」事，係其他是非亦未定。就算真係關「炒人」事，亦唔好諗住被炒嗰個一定係自己。
余絲韻