絲絲講場：A.I.型男索女殺入財圈
A.I.（Artificial Intelligence，人工智能）型男索女殺入金融界！話說今時今日開研討會，齋搵有分量嘅名人出席未必夠睇頭，尋日喺上海舉行嘅瑞銀大中華研討會，就請來靚女智能機械人「佳佳」與中國科技大學教授同場出席演講。
行動自如又Talk得
佳佳係由中科大研發，去年喺合肥出世，係首個國產互動機械人。佳佳不但理解對話，仲具備面部微表情、口形及軀體動作，而且顏值高身材好。咪以為佳佳只做花瓶，佢尋日喺大會嘅開幕儀式中就同瑞銀亞太區總裁施許怡敏同台，向超過二千名與會代表見面同交談！下晝佳佳仲同中科大計算機科學與技術學院陳小平教授一齊主持演講，主題就係講A.I.。仲唔係美貌與智慧並重！
唔止咁，佳佳仲自己行得走得，就算喺複雜環境下，佢都可以透過定位導航行動自如。佳佳去年初出道時嘅第一個Function，就係喺合肥一個逼爆商場做導遊。估唔到一年都未夠，就升呢踩入金融研討會，勁過金融小花。
十年創5千萬個職位
驚驚？羨慕？香港一樣有，下周舉行嘅亞洲金融論壇，亦請咗位A.I.型男喺首日嘅招待酒會做MC（主持），佢一樣可以同人對答，仲有細緻面部表情。呢位A.I.型男係喺香港科學園入面一間美國公司出世，雖然係土生土長，但佢暫時只曉講英文！
擔心A.I.搶飯碗？瑞銀財富投資總監辦公室話，A.I.會喺未來十年創造2,500萬至5,000萬個新工作崗位至真喎。
余絲韻