絲絲講場：碧桂園CFO辭職做文青
碧桂園（02007）出通告，任職近三年嘅執董兼CFO（首席財務官）吳建斌辭任，理由就係佢計劃投放更多時間於個人興趣，仲講明係攝影及寫作，好有文藝青年（/中年）Feel！
查實，吳總堅係攝影發燒友同小說作家，出過唔少影集同書，財經書又有，長篇小說又有，佢影相仲攞過唔少獎添。
三個「文武雙全」散Band
記得碧桂園一四年將當時為中國海外集團常務董事嘅吳總羅致旗下，碧桂園總裁莫斌仲話管理層皆「文武雙全」，因莫斌、吳建斌及聯席總裁朱榮斌名中都有個「斌」字。可惜呢個組合今年三月業績後恐不復見。
余絲韻