絲絲講場：股市一月效應搵鬼信！

已經係二○一七年一月，又係時候趁熱鬧講吓「一月效應」（January Effect）。乜來？即係每逢一月份，股市多數升咁話喎。

嗱，呢個「一月效應」係傳統投資智慧，聽講最初出現一月效應嘅國家係美國，之後啲人話個效應喺其他股市亦先後應驗，仲有學者分析堅有其事咁話。

一月效應背後有套理論，話出現呢個效應有四大原因。首先係美國嘅稅務政策，美國投資者獲利的話要交稅，蝕咗有得扣稅，所以年尾臨交稅前幾日，投資者多會沽出手上蝕錢嘅股票扣稅，新一年又一條好漢！

第二係出咗花紅。年尾年初係出雙糧、花紅嘅黃道吉日，突然有錢即刻身痕，入市最緊要！

第三係新年願望「A New Me」，想話打倒「蝕錢的我」做個精明投資者？首要做嘅梗係入市先！

最後一個原因係，上市公司喺一月總會發表前景分析等爭取表現，吸引投資者入市。

「一月效應」係真唔係？有圖有真相，實情係五五波。過去十年「一月效應」喺美國只係應驗咗5次，而最近3年美股都唔中！恒指？十年來，都叫做有六年嘅一月係升市。呢個傳統投資智慧仲信唔信得過？你話呢？

余絲韻

絲絲講場：股市一月效應 搵鬼信！