理財Campus：80後慳足十年終於買到樓

Andy自小移民加拿大，在當地讀書生活，畢業後曾任補習老師、連鎖廚具店銷售員、格仔舖老闆及夜市檔主，為求搲銀實行博到盡。辛苦工作多年，戶口終有六位數積蓄。他亦坦言，「要儲錢，一係諗多啲方法賺錢，一係就慳錢。」Andy三年前回流香港。他指，香港比加拿大更易賺得人生第一桶金。回港後，他毅然投身金融業，在證券行從事財富管理，協助客人買賣債券。因求學時期曾修讀經濟，所以買賣股票、債券逐漸得心應手。不過，香港工作忙碌，工時動輒以十小時起，Andy無暇再經營副業，為了上車，唯一手段就是慳錢。

一餐40元 甚少旅行

Andy現時一個月可儲六成糧，他亦坦言，成功上車全憑夠慳。他手中的電話「只係平平無奇嘅小米電話，都係一千蚊多少少」，他解釋，以前曾賣二手電話，經驗告訴他科技不斷推陳出新，潮流永遠追不上。

因為在中環工作，食飯交通均所費不菲，所以Andy午餐時大都光顧連鎖快餐店，一餐僅40元。此外，Andy三年以來甚少旅行，僅飛過上海及日本，更言「我係平價機票先捨得去」。

五成按揭月供萬二

慳家男Andy對開支「諗過度過」，無獨有偶，他遇着同樣慳家的女友。他表示，兩人外出吃飯時，若肚子不是太餓，會單嗌一個飯「加底」共享；而且兩口子甚少到戲院，寧可買碟回家欣賞，務求慳得就慳，兩人更到銀行開聯名戶口齊齊儲錢。

奇招盡出兼儲足十年，加上家人幫助，Andy今年十月終達成夢想，購入將軍澳藍塘傲一個400多呎單位，總值逾500萬，敍造五成按揭，供款年期30年，與女友兩人每月合供1.2萬。他表示，自小受雙親影響，認為買樓保值兼抗通脹，而與女友合供1.2萬未算吃力。

最後，他寄語年輕人，應慳得就慳，不要做月光族，平日須抵受物質誘惑，勿追求新鮮及潮流，而最重要的是對自己守承諾，說儲多少便儲多少，更以自己在加拿大的經歷為例，用不同渠道掘金。「我知道搵得一萬幾，儲錢會辛苦，我都經歷過，但你要行出第一步，唔好驚失敗！」