港股繼續陰陰乾，昨日恒指再跌103點收報21,729點，主板成交再縮減至只得537億元，回購計劃剛結束的滙豐控股（00005），下跌1.9%或1.25元，收報62.5元，成悶市中拖低大市的火車頭。
一六年仲有六個交易日就講拜拜，十二月期指則在下周四，還有五個交易日就結算，基金一片提早收爐氣氛，指數睇落跌幅唔大，但市況其實頗差勁。
昨日約千隻股份向下，反映陰乾已不限於指數權重藍籌，就連莊家及散戶參與的股仔亦都冇運行。
強勢股滙控轉弱，連破10日及20日線，港股失卻最後的定海神針，向250日線21,450點推進似乎無懸念，數落去，現時牛證街貨區在21,500至21,699點的兩百點內，還有接近2,700張期指等量的街貨，大戶會唔會食得唔好嘥，推多兩百多點落去殺埋最後一班好友先埋年，機會不可抹殺。
不過，市況咁靜，為兩、三百點水位衰收尾就無謂，反而睇住要唔要為22,000點認購認沽期權短倉，逼近打和點作全數對沖好過。
John Mullen