大約於七個星期前，港府宣布為本港樓市加辣，主要是要壓抑市場炒作第二套房的風氣。當時有人同我講：港府之所以要出手，是由於中資的海航集團來港搶地太猖獗，他們於十一月初以88.37億元（每呎13,500元）的天價投得了啟德的1K區地皮，刷新了東九史上的新高。
辣招推出至今已個多月，十一月中原城市領先指數報145.17，再創62周新高。既然港、九同新界買家都咁食得辣，來自北方的代表又點會輸蝕？本周一，啟德1L區地皮再以54.12億元（每呎13,600元）天價批出！花落誰家呢？又是海航！
東九的麵粉於七個星期內再創新高，給市場最大啟示係：本地發展商點鬥？雖然我有理由相信海航今次的出價係擺到明「大石砸死蟹」的，用意是無論如何連取兩地來發揮協同效應。之但係海航於十月時已經用507億元買了希爾頓酒店的25%股權。海航係咪真係咁有錢呢？
睇真啲，其實海航為了shopping而撲水都撲得好辛苦的！打從集團睇中了上一塊啟德地皮之後，他們已經把旗下四家上市公司，包括海航實業（00521）的逾56%股份押畀銀行來換貸款。為的是甚麼呢？真係只睇好港樓的前景咁簡單？定係想為資金搵出路呀？
今日，我先不評論為甚麼州官可以放火，但是百姓就唔可以點燈。但由於人民幣加速貶值和內地陸續調控各省市房地產的政策下，內地企業（即使如海航般不是房企）都可能繼續透過來港投地，把資金「走出來」。
話口未完，昨日執筆時就有報道指，海航又花了6億元入主上市珠寶商KTL（00442）喇！
富昌金融研究部總監 譚朗蔚（作者為註冊持牌人士）