絲絲講場：永隆龔志明「囡」遊大過天
作為Banker，唔使講，壓力一定大到一個點，唔少Banker都會趁聖誕節旅遊輕鬆吓。
永隆銀行存款部主管龔志明話，嚟緊會孖住老婆同囡囡嚟個台灣遊，一向錫屋企人出晒名嘅龔生話「我只係去負責畀錢找數咋」。
行程交晒畀囡囡
龔生話臨近年尾，忙到氹氹轉，完全無時間去安排行程、諗吓有咩好地方享受天倫樂。不過，有支盲公竹就喺隔籬。
邊個？咪就係佢最錫嘅囡囡囉。佢話今次行程全部交晒畀囡囡話事，佢仲好自豪咁同絲絲講，幾時都話生囡好過生囝啦。
龔生最想做咩？佢話做咩都無所謂，最重要係要放到天燈。唔通龔生新一年有好多心願？非也，原來係龔太想放天燈，果然係愛妻號。
余絲韻