絲絲講場：鱷王教你睇通狂人經濟
全球最大嘅美國對沖基金公司Bridgewater Associates位創辦人達利奧，人稱鱷王。鱷王依家話，如果仲未睇過Ayn Rand（蘭德）寫嘅書，勸你好快啲睇，事關可以捉到路知候任美國總統特朗普點搞經濟。
周一鱷王喺LinkedIn貼文話，蘭德嘅書完全反映特朗普套思維。未睇過蘭德嘅書？連蘭德都未聽過？呢位生於一九○五年、卒於一九八二年嘅俄裔美國哲學家與小說家，最出名係強調利己及徹底自由放任嘅資本主義。蘭德認為個人有絕對權利只為自己利益而活，唔使為他人而犧牲，但亦唔可以強迫他人為自己犧牲。
愈賺錢愈「英雄」
所以鱷王仲話大環境好快急變：以前牟利就係「奸商」，遲吓愈賺錢就係愈「英雄」愈有Power。風向轉得仲急過八○年代初各國由鼓吹社會福利忽然變晒營商萬歲。仲記唔記得戴卓爾夫人做英國首相、列根上場做美國總統、科爾做德國總理嘅日子？
鱷王仲話，特朗普係強硬嘅Deal Maker，同人談判時完全唔介意衝撞，連組閣班底都係咁樣，可想而知經濟大氣候會點變。嫌蘭德啲書Dry？（絲絲唔覺Dry）鱷王話睇戴卓爾夫人本《The Downing Street Years》一樣得。
鱷王基金忽然V彈
話時話，鱷王打骰嘅Bridgewater旗下Pure Alpha II基金，今年截至九月底止本來勁蝕10.3%，但係之後回報勁升，截至十一月底止虧損大幅收窄至僅0.2%，幾乎打番個和！特朗普「爆冷」當選之後投資市場形勢大變，鱷王睇嚟真係捉到路o架！
余絲韻