絲絲講場：溫傑打跆拳遇上真愛

因為跆拳，佢十歲就遇到真愛！新鴻基金融集團財富管理策略師溫傑（Kenny）原來係跆拳道黑帶高手，仲因為呢門興趣，大概十歲識到佢嘅愛人，即係唔經唔覺兩人已經識咗超過廿年。

「我自細已經好鍾意功夫，但細個點識分跆拳道、空手道或其他武術，小學五年級時誤打誤撞報咗跆拳道興趣班，就咁識咗同樣住喺屯門區嘅愛人。」Kenny話，其實佢哋一開始係普通朋友，直至佢升讀大學時兩人先成為情侶。

Kenny依家已經係跆拳道黑帶高手，佢仲話當年學跆拳道訓練到紀律同恒心，幫到依家份工作。不過，依家工作太忙，佢唔只少咗練跆拳道，仲無乜時間休息添！

「每日只瞓到四個鐘，禮拜一到五要每朝六點半起身，到晚上十一點先返到屋企，周六、周日又時時出外公幹，所以只能趁節日長假多陪家人同兩隻貓。」Kenny自爆，唔計公眾紅假，佢今年無放過長假休息或去旅行，仲話公幹就當去咗旅行！咁捱得，果然係習武出身！

余絲韻