絲絲講場：湯文亮一條橋 換50份早餐
聽紀惠集團行政總裁湯文亮分析辣招就聽得多，原來佢出招亦好辣，佢教地舖業主對付反口租客，呢招係「欲擒先縱」。
妙計逼反口租客磅水
話說湯文亮去茶餐廳，有位茶客求教。茶客係地舖業主，但同租客一早傾好晒後，租客臨急先反口話原裝修唔啱用，唔肯畀頂手費，仲要業主拆晒裝修。業主得兩日時間，又嬲又急。湯文亮就醒業主一招，話若業主認為掂，就請佢食早餐。辦法係，照租客要求免收頂手費，甚至幾多拆裝費都照畀，仲要表現到好開心咁。嗱，但等租客入伙，一見佢生意好，就發封律師信提佢完約後唔再續。如果租客醒目，八成機會自動將頂手費送上。
茶客聽完講聲多謝就走咗。結果？有人送咗50個早餐上湯總公司！湯文亮呢招既唔會傷和氣，又能令租客自動就範，辣！
余絲韻