特朗普成為美國候任總統，之前預言的金融世界末日不但無發生，反而掉轉頭喪炒狂人大興土木，擴大政府開支刺激經濟的政綱。就任前的蜜月期美元美債息齊升的局面，美元資產使出一招「吸星大法」盡吸天下閒錢，新興市場包括中港股市想有運行，恐怕唔易。
騰訊控股（00700）季績無驚喜，200元成為短期阻力，深港通無下文，缺乏新消息刺激，昨日港股牛皮悶局，恒指跌17點收報22,262點，主板成交縮到得番622億元。古勝未知耶倫在聽證會有乜偉論，但觀乎利率期貨預示下月議息加息機會達到九成，相隔一年的美國二輪加息，倫媽好大機會粉墨登場，扮成聖誕老人咁當禮物咁送畀大家。夾喺中國經濟持續放緩，強匯價及升息預期之間，港股好似無乜炒上藉口。
英國脫歐公投及美國大選連爆兩鑊，話畀大家聽所謂金融精英事實堅係離地，對時局預測未必準過你同我。財政外強中乾的美國，真有條件衝破債務上限，勁舉債投入基建？睇番特朗普未上任已走數（如築圍牆變建圍欄），人癲我癲，短期當正列根二世咁去炒無問題，至多賭埋下個月，等入主白宮就會見真章。
事實上，睇到利率期貨，即使十二月美息加到去0.5至0.75厘範圍，一年後即明年十一月，有39.4%概率期間都只可加多一次息，上到0.75至1厘，同維持在0.5至0.75厘34.3%概率差唔多，即使加兩次去到1至1.25厘，只係講緊18.2%，簡言之，十二月加完，未來一年再加空間唔多。
香港樓市加辣，搞到印花稅高達樓價三成，港人嘩嘩聲，但對於內地客，三成買路錢根本唔放在眼內。加辣後，不斷見額頭寫住「有錢就是任性」的買家前仆後繼，一副「豪畀你庫房又如何」的態度。加辣後首個地皮招標，觀塘茜發道住宅地皮繼續超過估價上限成交。
發展商唔會死錯人，睇見大環境人仔跌到無底，內地走資傾向唔貴唔買，若在股市與近排入市買家之間其中一方睇錯，在下估係前者。昨尾市本地地產股異動，睇怕已跌過龍，可以撈了。
古勝