絲絲講場：富昌郭總兩代鬥文「財」
阿爸原本諗住做詩人，阿孻仔就讀犯罪學出身，結果依家父子齊齊都係做金融生意。講緊係富昌金融集團主席郭俊偉與佢孻仔郭曉澤（Danny）。
大仔修金融 細佬讀犯罪學
尋日郭俊偉阿郭老闆帶埋Danny同傳媒飯敍。Danny啱啱外國畢業返嚟，加入公司只係幾個月，依家跟阿爸去唔同部門了解公司運作，主要負責內務，卡片Title係主席助理。Danny仲謙稱自己唔係第二代接班人，仲有好多嘢要學咁話。
細問之下先知，原來Danny大學主修Criminology（犯罪學），真係好冷門喎！郭老闆話係Danny自己揀嘅，又話讀咩科都可以做生意，「好似我本身想做詩人，寫唐詩個啲﹗」不過最後郭老闆選擇投身商界做生意，話可以賺多啲錢幫人！
除咗孻仔Danny，大公子前幾年都有喺富昌幫手，副總經理方少逸仲讚大公子親力親為，連點幫客開股票戶口都學埋，不過大公子依家去咗外國攻讀金融，輪到細佬接棒。
郭老闆仲自爆有過一段「肥佬時代」，四十幾歲個陣喺醫生勸告下減肥，一開頭夜晚會餓到手震，每日朝早食一斤烚菜心「好似牛食草咁」，再加做運動，最終成功三個月內搣甩十幾公斤，依家Keep住喺68公斤左右。不過佢每晚都仲會上磅，一發現重咗就即刻節食。勤力過絲絲！
余絲韻