中港股市昨日午後升幅擴大，恒指收報23,394點，升356點，重上50日線，主板成交雖增至599億元，但仍屬偏低。升勢主要由幾隻重磅股帶動，騰訊控股（00700）、滙豐控股（00005）及友邦保險（01299）合共貢獻恒指116點。今日內地第三季GDP數據出爐，睇吓有冇機會令反彈延續。
內地樓市調控措施接二連三出台，又打擊違法銷售行為，令內房股受壓。昨日中國海外（00688）公布首三季業績，純利按年增長近三成，單計第三季更加上升1.1倍至83.2億元。
有好消息，難怪股價立即反彈近5%，連帶多隻內房股亦向好。面對手頭上人民幣貶值，資金流向樓市股市或者保險市場，樓市熾熱之下，買磚頭博升值潛力最大，睇怕情況仍會持續一段時間。
多隻半導體股近期走勢唔錯，好似之前提及過的中芯國際（00981）、華虹半導體（01347）及ASM太平洋（00522）等。ASM獲瑞銀睇好，將其評級升至「買入」，目標價由62元大幅提高到85元，刺激昨日股價升9.5%。睇番業績，集團上半年純利按年跌三成，收入跌4.2%，不過按季度睇則見改善。市場對板塊關注度上升，後市可加以留意。
三星Note 7手機停產，有部分設備供應商預計會受到影響，當中包括比亞迪電子（00285）。早前有分析指，集團主要為三星生產S系列外殼，故Note 7停產對其影響有限。三星宣布會對相關供應商作出補償，已經生產咗的零件，會照畀錢。依家有補償方案，掃除咗一啲負面因素。之後就要睇消費者對三星的信心，以及來自中國品牌的訂單情況。
比亞迪電子股價上周跌至6元附近現承接，昨日升2.87%收報6.45元，重上10日、20日及50日線，貼近短期阻力6.7元。其八月底公布的中期業績遜預期，令股價跌至6元水平，集團將於本月二十八日公布第三季業績，不妨睇埋季績表現後再謀跟進。
司慕渢