早前網上流傳了一首來自日本的洗腦歌，叫做《PPAP》。首歌惹來了各地網民爭相改編，熱爆全球！近日，中港股市又有一個潮語在崛起，叫做「PPP」，亦同樣受到市場高度重視。
其實「PPP」是「公共、私營合作制」（public private partnership）的簡稱，意思指政府同社會（即是私營企業）合資來發展城市基礎設施。
唔明呀？其實就好似香港的海底隧道咁：由政府去簽發特許權，由私營企業來負責投資融資、興建、經營同保養。經營期間，私營企業就負責袋錢、回本，而政府則負責監督。到若干年後，特許權到期了，條隧道就係歸政府所有。
假如要為「PPP」舉一實例，而是要讓全香港人都可以清楚明白的，我會說是由康文署同地產商聯合發展的星光大道擴建計劃。咁你明啦？於香港做的「PPP」其實不多，因為一有，社會上就有一啲反對的聲音。
無論如何，目前內地就是要借「PPP」來催內需、谷經濟！事關財政部於十月十二日就發布了總值萬億元人民幣的「公共服務領域供給側結構性改革」方案，實行孖埋內地的私營企業，風險、回報兩份分！
受惠板塊就多囉，簡直係圍骰通殺呀！據內媒引述，包括能源、交通運輸、市政工程、農業、林業、水利、環境保護、保障性安居工程、醫療衞生、養老、教育、科技、文化、體育同旅遊等都受惠。
以近日市場反應來睇，基建同鐵路股都已率先落鑊。「PPP」概念無限loop，往後不排除會再炒一轉水利同環保股！
富昌金融研究部總監 譚朗蔚（作者為註冊持牌人士）