絲絲講場：內地StartUp 堅‧搵命博
為咗創業，要付出幾多？內地Start-Up公司「春雨醫生」位創辦人兼CEO張銳，月初心肌梗塞突然去世，終年只44歲。消息激發內地Tech界反思，為創業要付出嘅代價到底有幾沉重。
醫療網舵手趕IPO出事
更令人慨嘆嘅係，佢一手創立兼湊大嘅「春雨醫生」，本身就係個互聯網醫療平台！公司估值成10億美元，今年六月啱啱先完成咗12億人幣嘅融資，話準備IPO（首次公開招股上市）添。公司跑入直路之際，張銳咁就走咗。
張銳出名拚搏，佢出身記者，一一年出來創業搞「春雨醫生」。
佢自己之前亦講過創業壓力、好焦慮。最難捱時，半夜兩、三點發電郵傾產品同商業模式，一大朝早又要跑去說人投資，同樣嘅內容，每日至少講兩次，仲要預埋答啲唔知係乜嘅問題。佢食唔安瞓唔樂，「晚上睡前會擔心資金鏈斷了怎麼辦」；第二朝又會自我鼓勵話，未搵到投資只係「緣分未到」。就係咁，創業5年，佢鬢角都白晒。
「996」 壓力超硅谷惹反思
「創業公司創始人承受的壓力和孤獨感不是普通人所能理解的。」連火幣網（內地最大比特幣交易所之一）創辦人李林喺微信朋友圈度悼念時都話，「尤其是互聯網行業，這裏的進入門檻低，競爭卻非常殘酷，簡直是如履薄冰。」就連美國業界都話，內地新創圈所面對壓力，大過美國硅谷。
張銳走得咁突然，內地Tech界紛紛悼念及反思，互聯網行內嘅「996」潛規則（即是每日開工朝9晚9，每周返足6日）是否太過？OT文化是否係時候要改變？連絲絲一路寫都一路自問，拚命到底值唔值……
余絲韻